ئێوارەی 18/9/2010، فیستیڤاڵی ساڵانەی كولتوریی كوردی بە بەشداری ژمارەیەكی زۆری كورد، لە ستۆكهۆڵم سازكرا. چەندین گۆرانیبێژو و سیاسەتڤانی سوێدی و كورد بەشدارییان كرد و سیاسییەكان بۆ سەرنجڕاكێشانی كوردە دەنگدەرەكان تا لە هەڵبژاردنی سوێد كە رۆژێك دوای ئەوە دەكرا دەنگیان پێبدەن كەوتنە بەڵێنی بریقەدار بۆیان. لەنێو گۆرانیبێژە بەشداربووەكاندا، هانی، بە كراسێكی شین و رەنگە كوردییەكانەوە، سەرنجی بەشداربووانی رادەكێشا. (رووداو) لەوێ ئەو هەڤپەیڤینەی لەگەڵ سازكرد
هەڤپەیڤین: سالە كوردە
رووداو: دوا ئەلبوومت چۆن بوو؟
هانی: دوا سیدی من كە بڵاوكراوەتەوە بەناوی (دایك)، لە یانزدە گۆرانی پێكهاتووە، هەموو ئاوازەكانی خۆم دامناون. پرۆژەی ئەو كارەم دەگەڕێتەوە بۆ پێنج ساڵ پێش ئێستا، بەداخەوە زۆر دواكەوت و پشتگوێخرا، تا ئەوەبوو بە زەحمەتێكی زۆر بەرهەمم هێنا. وەك تەكنیك كارێكی هونەری كلاسیكە، دەتوانم بڵێم تائێستا لە ناو كورددا كاری وا كەم كراوە و ناسنامەیەكی تایبەت بەخۆی هەیە. هیچ كاتێك بیرم لەوە نەكردبووەوە بۆ بازرگانی ئەو كارە بكەم چونكە هەستێكی ناخی خۆم بوو، راستییەكەی دەبوو چوار ساڵ پێش ئێستا بڵاوبكرایەوە.
رووداو: پێشوازی لێكردنەكەیت پێ چۆن بوو؟
هانی: راستییەكەی رێكلامی زۆر بۆ نەكرا، خۆیشم كەمتەرخەم بووم. دەبووایە چەند كلیپێكم بۆ بكردایە، سەرەڕای ئەوەش پێشوازیەكی زۆر باشی لێكرا، لەم دواییەدا كە سەردانی سلێمانیم كرد، تەنانەت ئەوانەی كە ئاشنایەتییان لەگەڵ موزیكدا نییە، دەیانگوت ئێمە پێویستیمان بەكاری لەو جۆرەیە.
رووداو: گۆرانی زازاكی هەتا هەورامی و سۆرانی تێدایە. بە مەبەست واتانكرد یان رێكەوت بوو؟
هانی: من خۆم كاتێك ئاواز دادەنێم، ئاوازەكە خۆی زاراوەكە دابین دەكات.
هانی: نا، من كە ئاوازەكە دادەنێم، ریتمی ئاوازەكە زاراوەكە دەدۆزێتەوە. زۆربەی كارەكانیشم لەسەر شتێك بووە، بۆ نموونە لەسەر ژن. هەوڵیشمداوە لە فۆلكلۆرەوە هەتا موزیكی مۆدێرن لە خۆ بگرێ. دەتوانم بڵێم ئەو سێدییە دیاریەك بوو بۆ موزیكی كوردی، چونكە زۆر پێوەی ماندوو بووین.
رووداو: ئەوانەی موزیكی ئەو بەرهەمەی تۆیان ژەنیوە، كوردن یان بیانی؟
هانی: ئاكۆ عەزیر، موزیكەكەی ئامادەكردووە، بەڵام ئەوانەی موزیكەكەیان بۆ لێداوە، دەتوانم بڵێم لە باشترین سۆلیستەكانی ئەوروپان.
رووداو: هەندێك لە تێكستەكانت، لە شیعری هەورامی وەرگرتووە، ئایا تۆ زۆر بەدوای شیعردا دەگەڕێی؟
هانی: بەڵێ من خۆم سەرەتا بە شیعر دەستم پێكرد و بە فارسی دەمنووسی، پاشان شێوەكاری و ئینجا گۆرانی، دایكم خۆی هەورامی بوو، بۆیە باش لە شیعرەكان دەگەم. ئێستایش، ئەگەر كەمتریش بێت، شێوەكاری دەكەم و حەزدەكەم كاتێك كۆنسێرتێك دەكەم، تابلۆكانیشم نیشانبدەم، هەرچەندە ئەوەندە زۆر نین بەشی پێشانگایەك بكەن و زۆرەبەیان تابلۆ كۆنەكانمن.
رووداو: لە ماوەی ئەم چەند ساڵەی دواییدا، هانی بە چەندین شێوە خۆی نیشانداوە، لە كۆرەك تیڤی شێویەك بووی و ئێستا بە جلی كوردی و رەنگەكانی كەسك و سوور و زەردەوە دەتبینم؟
هانی: من دەبێ خۆم بچمە نێو كۆمەڵگەكەمەوە و بچمە نێو گەنجانەوە بزانم پێویستییان بە چییە، من گەنج بووم و لاواز بووم، راستییەكەی من بەو بەرهەمەوە چوومەوە بۆ كوردستان، بەڵام پشتگوێیان خست. حەزدەكەم كاتێك گەنجێك دەگەڕێتەوە بۆ كوردستان بڕوای پێبكەن. كاتێك من چوومەوە بۆ كوردستان كارەكەمیان زۆر پێ جوان بوو، بەڵام وتیان ئێستا لە كوردستان باوی ئەو كارانە نەماوە، شتی نیشتیمانی بەسەر چووە، ئێستا سەردەمی كاری خۆشەویستی و عاشقانەیە، دەبێ تێكستێك بێت دڵی خەلك خۆش بكات، منیش وتم باشە، ئەگەر پارچەیەكی كورستانیش دڵیان پێی خۆشبێت، قەیدی چییە، بەڵام لەلایەكی دیكەوە ئێمە كوردین، دەبێ بیر لە پارچەكانی دیكەی كوردستانیش بكەینەوە، من خۆم چەندین هاوڕێم بێسەروشوێنن، چۆن دەتوانم لەبیریان كەم.
رووداو: ئەو كارانەی لەگەڵ هەڵكەوت زاهیر كردت، زۆربەی ئاوازەكانی ئارابیسك بوون، بۆیە رەخنەیان لێگیرا، ئایا پەشیمان نیت لەو كارە؟
هانی: نەخێر پەشێمان نیم لەوەی كارم لەگەڵ كاك هەڵكەوت زاهیر كردووە، هەڵكەوت زاهیر تەنها یەك ئاوازی عەرەبی بۆمن داناوە، ئەوانیدیكە هەمووی پۆپێكی زۆر بە كوالیتییە، جیاوازە لەوانەی دیكەی كە هەڵكەوت زاهیر ئاوازی بۆ داناون. بەڵام بەڕاستی من ئەو گۆرانییەم خۆش ناوێت كە ئاوازەكەی عەرەبییە، بەڵام خەڵك پێیان خۆشبوو. دەتوانم بڵێم ئەو كارەی كردم لە كوردستان وەكو پۆپ شتێكی جوان بوو، بەڵام دووبارەی ناكەمەوە. دەبێ ئەوەش بڵێم من كەسێكم وەك هونەرمەندانی دیكە ناكەم، كاتێك لەسەرەتاوە سیدییەك دەردەكەن، ئیتر لەسەر ئەو رێچكەیە دەڕۆن و هەموو كارەكانیان لەیەك دەچێت، من بە بەرنامە و تێمەی تایبەتی كار دەكەم، دەكرێ تێمەیەكم باسی خۆشەویستی، یەكێكی دیكە باسی ژن یانیش نیشتیمانپەروەری بێت، واتە پرۆژەكانم جیاوازیان تێدایە. هونەر و موزیك پڕن لە هارمۆنی و هەر شتەو رەنگ و بۆنی خۆی هەیە.
رووداو: بەڵام كە هاتییەوە بۆ ئەوروپا، گلەیت هەبوو؟
هانی: راستییەكی هەندێك رۆژنامەنووس بەمەبەست قسەكانی منیان گۆریبوو، من پێم وتن نابێ ئەو گفتوگۆیەم بڵاوبكەنەوە، بەڵام ئەوان وەك خۆیان ویستیان بڵاویان كردەوە، نازانم بۆ دەیانەوێ كەسایەتی هونەرمەند بشێوێنن. من لەوە نیگەران بووم كاتێك چووم بۆ كۆرەك تیڤی پێیان وتم كە كارەكە كەیفیەتێكی زۆر باشی دەبێت، بەڵام كە چوومە ناو كارەكەوە ئەوە نەبوو كە من دەمویست، دەتوانم بڵێم دە لەسەتی ئەوەش نەبوو كە بەڵێنیان بە من دابوو.
رووداو: دەڵێن 25 هەزار دۆلارت وەرگرتووە بۆ ئەو گۆرانییەی كە بۆ بانگەشەی هەڵبژاردن بۆ لیستی كوردستانی وتت؟
هانی: ئەوكارە، پارەی ستۆدیۆ و ئەرنجومێنتی موزیكی دەوێت، دەتوانم بڵێم لە كۆتایی كارەكەدا، هیچ پارەیەك نە بۆ من و نە بۆ ئەرنجومنت نەمایەوە. مەبەست لەو كارە پارە پەیدا كردن نەبوو، من خۆم لە باشوور دووربووم و ئەزموونم نەبوو، من ئەو كارەم وەك كارێكی نەتەوەیی كرد كە لە خەمی نەتەوەكەمدا بووم.
رووداو: بەڵام مەسەلەی هەڵبژاردن كارێكی دیموكراتییە و پەیوەندی بە نەتەوە بوونەوە نییە؟
هانی: راستە، بۆیە من جارێكی دیكە بەهیچ شێوەیەك كاری وا بۆ هیچ لایەنێكی سیاسی ناكەم. چونكە من دەمەوێ بە دەنگی خۆم خزمەتی تەواوی نەتەوەكەم بكەم نەك لایەنێكی سیاسی.
رووداو: پرۆژەی داهاتووت چییە؟
هانی: كۆنسێرتێكم بە دەستەوەیە كە تائێستا كاتەكەی دیاری نەكراوە، لە شاری سلێمانی دەیكەم و كۆمپانییەك ئەو كارەم بۆ دەكات، كە نامەوێ جارێ ناوی بەرم. هەروەها بەنیازم لە سلێمانی چەند كلیپێك بكەم.
رووداو: دەڵێن ئێوە لە ئەرستۆكراتەكانی سنەن، لە ماڵەوە بە كوردی قسەتان دەكرد؟
هانی: بەڵی ئێمە لە بنەماڵەیەكی سنەین و هەر بە كوردی قسەمان كردووە، خانەوادەی ئێمە زۆر مەزهەبی بوون، بەڵام لەو لاشەوە كەسانێكمان هەبوون كۆمۆنیست بوون. بابەگەورەم، سەدرولئیسلام موجتەهیدی دەیان كتێبی دەربارەی فەلسەفەی ئیسلامی نووسیوە، بەڵام هانیشی تێدا پەروەردە بووە.
Inga kommentarer:
Skicka en kommentar